परीक्षा केन्द्र परिवर्तन गरिएको भन्दै सर्लाहीका विद्यार्थीहरु आन्दोलीत भएका छन्। परिक्षाकाे मुखैमा आएर परीक्षा केन्द्र परिवर्तन गरिएको भन्दै सर्लाही क्याम्पस मलंगवाका स्नातक तह चौथो वर्षका विद्यार्थीहरू आन्दाेलित भएका हुन ।
उनिहरुले आज (आइतबार) बिहान परीक्षा केन्द्र परिवर्तन गरिएको विराेधमा टायर बालेर सडक अवरुद्ध गरेका छन्। उनीहरूले नवलपुर-मलंगवा सडकखण्ड अन्तरगत क्याम्पस अगाडि टायर बालेर नाराबाजीसहित विरोध प्रदर्शन गरेका हुन्। जसका कारण सदरमुकाम मलंगवाबाट सञ्चालन हुने र मलंगवा आउने सवारीसाधन अवरुद्ध भएका छन् ।
स्नातक तह चौथो वर्षको २० गते मंगलबारदेखि हुने परीक्षाअन्तर्गत सर्लाही क्याम्पस मलंगवाको परीक्षा केन्द्र (होम सेन्टर) कायम गरिएको थियाे , तर शनिबार मात्र बरहथवास्थित शुभजनता क्याम्पसमा परीक्षा केन्द्र सारिएपछि विद्यार्थीहरू आन्दोलित भएका हुन्।
विश्वविद्यालयको वेभसाइटमा पनि मलंगवाको परीक्षा केन्द्र सारिएको बारे कुनै जानकारी नराखिएको र लिखित रूपमा क्याम्पस प्रशासनलाई कुनै जानकारी नआएको क्याम्पस प्रमुख राजेश यादवले बताए ।
अन्तिम समयमा परीक्षा केन्द्र सारिँदा विद्यार्थीलाई समस्या हुने भन्दै यादवले अन्य क्याम्पसको भने होम सेन्टर नै कायम रहनुले आफू आश्चर्यचकित भएको बताएका छन् .