गण्डकीका मुख्यमन्त्री पोख्रेलद्धारा भरत तालको अवलोकन

कमलामाई खबर सम्वाददाता    प्रकाशित: २०७८-११-२२ गते   ३७३ पटक हेरिएको

 सर्लाहीको बागमतीमा निर्माण भएको दक्षिण यसिया कै ठूलो मानव निर्मित भरत तालको गण्डकी प्रदेशका मुख्यमन्त्री कृष्णचन्द्र नेपाली पोखरेलले अवलोकन भ्रमण गर्नू भएको छ ।  मधेश प्रदेशको जनकपुर र गण्डकी प्रदेशको पोखरा सिधा हवाई उड्यानको शुभारम्भको अवसरमा मधेश प्रदेश आउनु भएका मुख्यमन्त्री पोखरेलले आइतवार भरत तालको अवलोकन भ्रमण गर्नू भएको हो ।  
१८ सदस्यीय टोलीको नेतृत्व गर्दै मुख्यमन्त्री पोखरेलको भ्रमण टोलीले बागमतीको बागमतीको भरत तालको अवलोकन भ्रमण गर्नू भएको बागमती नगरपालिकाका नगर प्रमुख भरतकुमार थापाले जानकारी दिनु भयो ।
मधेश प्रदेशका उद्योग, पर्यटन, वन तथा वातावरण मन्त्री शत्रुधन महतोले मुख्यमन्त्री पोख्रेलको भ्रमण टोलीको नेतृत्व गर्नु भएको थियो । गण्डकी प्रदेशका मुख्यमन्त्री पोख्रेलको निमन्त्रणामा केही समय पहिला मात्र मधेश प्रदेशका मुख्यमन्त्री लालबाबु राउत गण्डकी प्रदेश भ्रमणमा पुग्नु भएको उहाँका प्रेस संयोजक आतिश मिश्रले जानकारी दिनु भयो । उहाँका अनुसार सोही समयमा मुख्यमन्त्री राउतले मधेश प्रदेश भ्रमणको निम्ता दिनु भएको थियो ।
 सोही आतिथ्यता स्वीकार गर्दै आफू मधेश प्रदेश भ्रमणमा आएको मुख्यमन्त्री पोख्रेलले बताउनु भयो । मुख्यमन्त्री पोख्रेलको टोलीले भरत तालमा रहेको मिनी क्रुजमा केही समय सयर गरेको थियो । सोही क्रममा मुख्यमन्त्री पोख्रेलले तालको निर्माणको अवस्था यसको भावी योजना, तालले भविष्यमा यस क्षेत्रको नागरिक र नगरको आर्थिक, सामाजिक, भौतिक विकासमा खेल्ने भूमिकाको विषयमा समेत जानकारी लिनु भएको बागमती नगरपालिकाकी उप प्रमुख लिला कुमारी मोक्तानले जानकारी दिनु भयो । ताल भ्रमणपछि मुख्यमन्त्री पोख्रेलले संघीयतालाई मजबुत बनाउन प्रदेशको पहिचान र हैसियत देखिनु पर्छ भन्ने कुरामा आफु विश्वस्त रहेको बताउनु भयो । 
यसको लागि अन्तर प्रदेशीय सरकारहरूको सद्भाव यात्रा जरुरी रहेको ठानेर मधेश प्रदेशका सरकार प्रमुखलाई आफ्नो प्रदेश भ्रमण गराएको उहाँको भनाइ छ । सोही अभियानअन्तर्गत आफु मधेश प्रदेश आइपुगेको पनि उहाँले बताउनु भयो । 
यस्तै जनकपुर–पोखरा सिधा हवाई उडानले दुवै प्रदेशको पर्यटन प्रवर्द्धनमा ठूलो भूमिका खेल्ने उहाँको भनाइ छ । जनकपुरधाम ऐतिहासिक पवित्र धार्मिक तीर्थस्थल र पोखरा जस्तो पर्यटकीय स्थललाई हवाई मार्गमा जोड्ने बित्तिकै दुवै स्थानमा आएका पर्यटकले सजिलै पोखरा र जनकपुरधामको भ्रमण गर्न सक्ने उहाँले विश्वास व्यक्त गर्नुभयो । 
शनिबारबाट सुरु भएको पोखरा–जनकपुर सिधा हवाई उडानमार्फत जनकपुर उत्रिएका मुख्यमन्त्री पोख्रेलले मधेशका सरकार र जनताको स्वागत अत्यन्त अविस्मरणीय रहेको बताउनु भयो । मुख्यमन्त्री पोख्रेल मधेश प्रदेशका विभिन्न धार्मिक एवम ऐतिहासिक स्थलहरूको भ्रमण गर्दै सर्लाही आइपुग्नु भएको थियो । मुख्यमन्त्री पोख्रेलको टोली रौतहटको नुनथर क्षेत्रको अवलोकन भ्रमणपछि पर्सा राष्ट्रिय निकुञ्जका लागि प्रस्थान गरेको छ । 

© Copyright 2019 Kamalamai Khabar. All rights reserved.
Design & Developed Journey For Tech