Close This

सीमानाकामा हुने आवतजावतले सर्लाहीमा कोरोना सङ्क्रमणको जोखिम बढ्दै

कमलामाई खबर सम्वाददाता    प्रकाशित: २०७८-१-१७ गते   १४८ पटक हेरिएको

 छिमेकी मुलुक भारतमा कोरोनाको सङ्क्रमण पुनः बढदै गएपछि सर्लाही जिल्ला पनि यसको उच्च जोखिममा परेको छ ।  भारतीय सीमा क्षेत्रबाट निर्वाध रुपमा आवतजावत भइरहेका कारण सर्लाहीमा पनि कोरोना सङ्क्रमण फैलिन सक्ने जोखिम बढेको स्थानीयवासीहरु बताउँछन् । ‘‘भारतीय बजार जाने आउने क्रम चल्दै छ”, ब्रम्हपुरी गाउँपालिका–५ का वडा अध्यक्ष कृष्ण मोहन कापरले भने, ‘‘सीमाक्षेत्रमा हुने आवागमन नरोकिँदा कोरोना सङ्क्रमणको जोखिम अत्यधिक बढेको छ ।” जोखिम बढ्दै गएपनि सो अनुसारको सुरक्षा सावधानी अपनाइएको देखिदैन्, उनले भने ।
‘‘भारतको बिहारमा समेत कोरोना सङ्क्रमण तीब्र रुपमा फैलिरहेको छ”, मलंगवाका स्थानीयवासी मुकेश यादवले भने, ‘‘छिमेकी जिल्लामा कोरोना फैलिरहे पनि सर्लाहीमा स्वास्थ्य सुरक्षा सावधानी अपनाइएको देखिदैन्, फलस्वरुप कुनै पनि बेला कोरोना भाइरस सङ्क्रमण समुदायस्तरमा फैलिन सक्ने भएकाले नेपाल भारत सीमाक्षेत्रमा हुने आवागमनलाई तत्काल रोक्नुपर्छ ।”
एकातिर सीमासँग जोडिएका भारतको बिहार राज्यका विभिन्न स्थानमा कोरोना सङ्क्रमण तीब्र रुपमा फैलिरहेकाले तत्काल भारतीय सीमा नाकाहरु बन्द गर्नुपर्ने आवाज उठे पनि कार्यान्वयन नहुदाँ अझै सर्वसाधारण वारिपारि गरिरहेका छन् । भारतको विभिन्न शहरमा काम गरी नेपाल फर्किने क्रम पनि अझै रोकिएको छैन् । खुल्ला सीमानाका कारण मुख्य नाकासँगै अन्य विभिन्न चोर बाटो भएर सर्वसाधारण नेपाल भित्रिने गरेका छन् । तीमध्ये अधिकांशले सिधै परिवार तथा आफन्तजनको सम्पर्कमा पुग्ने गरेका कारण कोरोना भाइस सङ्क्रमण उच्च दरमा फैलिने सम्भावना प्रवल रहेको छ । 
सर्लाहीको संग्रामपुरका स्थानीयवासी राकेश यादवले भने, ‘‘सरकारले एकातिर सीमानाका बन्द गर्ने बताइरहेको छ भने अर्कोतिर भारतीय बजार जाने र आउने क्रम बढेकाले जोखिम बढेको छ ।” खुल्ला सीमानाकाका कारण हुलका हुल मानिसहरु सीमावर्ती भारतीय बजार सितामणीमा जाने आउने गरिरहेकाले सङ्क्रमणको जोखिम बढेको तर स्थानीय तहबाट त्यसलाई रोक्ने प्रयास नभएको स्थानीयवासीहरुको गुनासो छ । यसका साथै दैनिक लाग्ने हाटबजारमा पनि सर्वसाधारणको चहलपहल ह्वातै बढेको छ । 
सर्लाहीका प्रमुख जिल्ला अधिकारी हेमराज तामांगले जिल्लामा कोरोना सङ्क्रमण फैलिन नदिन सुरक्षा सतर्कता बढाइएको बताउनु भयो । सर्लाही प्रबेश गर्ने नाकाहरुमा सुरक्षा निगरानी बढाउनुका साथै सीमानाकामा हेल्थ डेस्क राखिएको उहाँले जानकारी दिनु भयो । उहाँले भने, ‘‘सीमा नाकामा हुने आवतजावतमा कडाइ गरेका छौं, हेल्थ डेस्कमा स्वास्थ्य परीक्षण गरेर मात्र जान दिएका छौं, अब लुकीछिपी चोर बाटो भएर आइरहेको छ भन्ने त्यसलाई पनि रोक्ने प्रयास गर्छौ ।” विश्व समुदाय नै कोरोनाको महामारीसँग जुधिरहेकाले यसप्रति सबै सचेत हुनुपर्ने उनको भनाइ छ ।

© Copyright 2019 Kamalamai Khabar. All rights reserved.
Design & Developed Journey For Tech