पुर्व पश्चिम राजमार्ग स्थित सर्लाहीको हरिवन नगरपालिका ९, नोचामा वीङ्गरको ठक्करबाट एक महिलाको ज्यान गएको छ भने एक ट्राफिक प्रहरी हबल्दार घाइते भएका छन् ।
हरिवन नगरपालिका ९ नाेचास्थित छठघाटमा छठपूजा गरेर घर फर्किदै गरेकी सोही ठाउँकी अन्दाजी ५२ वर्षीया लक्ष्मी पोखरेलको दुर्घटनामा ज्यान गएको जिल्ला प्रहरी कार्यालय सर्लाहीले जनाएको छ । प्रहरीका अनुसार अस्थायी ट्राफिक प्रहरी पाेष्ट हरिवनका प्रमुख ट्राफिक प्रहरी हबल्दार सुबाेध कुमार यादव घाईते भएका छन् ।
मधेश प्रदेश-०३-००१ ज ०३४२ नम्वरको वीङ्गर लालबन्दीबाट यात्रु लिन हरिवनकै नयाँरोडतर्फ गइरहेको अवस्थामा ठक्कर दिँदा गम्भीर घाइते भएकी पोखरेललाई उपचारका लागि स्वाभिमान अस्पताल हरिवन ल्याउदा चिकित्सकले मृत घोषणा ईलाका प्रहरी कार्यालय हरिवनले जनाएको छ ।
वीङ्गरको ठक्करबाट छठघाटस्थलमा सडक सुरक्षार्थ खटिएका ट्राफिक प्रहरी हवल्दार यादवकाे बाँया खुट्टा भाँचिएको प्रहरीले जनाएको छ ।प्रहरी हबल्दार यादवलाई हरिवनमा सामान्य उपचारपश्चात लालगढ माेडेल अस्पताल ढल्केवर धनुषा रेफर गरिएको प्रहरीले जनाएकाे छ ।
दुर्घटनामा संलग्न वीङ्गर र त्यसका चालकलाई ईलाका प्रहरी कार्यालय हरिवनकाे नियन्त्रणमा राखेर अनुसन्धान सुरु भएको प्रहरीले जनाएको छ ।
