समयमै स्थानीय तह निर्वाचन गर्न माग गर्दै अनेरास्ववियू सर्लाहीद्धारा ज्ञापन पत्र

तत्काल स्थानीय तहको निर्वाचन घोषणा गर्न माग गर्दै नेकपा(एमाले)निकट विद्यार्थी संगठन अनेरास्ववियू सर्लाहीले आज(सोमबार) सरकारलाई ज्ञापन पत्र बुझाएको छ । केन्द्रीय कमिटीको सर्कुलर अनुसार जिल्ला प्रशासन कार्यालय सर्लाही मार्फत संघिय सरकारलाई ज्ञापन पत्र बुझाइएको अनेरास्ववियू सर्लाहीका सचिव आशिष बाबु दाहालले जानकारी  दिनु भयो ।
अनेरास्ववियू सर्लाहीका अध्यक्ष प्रज्वल ढुंगाना सहितका विद्यार्थी नेताहरुले सोमबार(आज) दिउँसो जिल्ला प्रशासन कार्यालय सर्लाहीमा पुगेर प्रमुख जिल्ला अधिकारी थानेश्वर गौतम मार्फत संघिय सरकारलाई ज्ञापन पत्र बुझाएका हुन् । तत्काल स्थानीय तहको निर्वाचनको मिति घोषणा गरेर समयमै निष्पक्ष निर्वाचन गराउन सरकारसँग ज्ञापन पत्रमा माग गरिएको छ । चुनावको मिति घोषणा नगरिए लोकतन्त्र बचाउने लडाइमा सडक संघर्षमा उत्रिने अनेरास्ववियूले ज्ञापन पत्र मार्फत सरकारलाई चेतावनी दिएको छ ।
नेकपा(एमाले)का विभिन्न भातृ संगठनहरुले तत्कालै स्थानीय तहको निर्वाचन घोषणा गर्न सरकारलाई दबाब दिने उद्देश्यले देशभरै प्रदर्शन गर्न थालेका छन् । ५ दलिय सत्ता गठवन्धनले आगामी जेठ मसान्तसम्म स्थानीय तहको निर्वाचन गर्ने निर्णय गरेपनि मिति भने तय नगरेका कारण आफुहरुले पनि ध्यानाकर्षण गराएको अनेरास्ववियू सर्लाहीका अध्यक्ष ढुंगानाले बताउनु भयो । निर्वाचन आयोगले दुई पटक सरकारलाई पत्र लेखेरै यथाशीघ्र चुनावको मिति घोषणा गर्न आग्रह गरिसकेको छ ।