प्रेस सेन्टर सर्लाहीमा थपिए पाठक,जनपत्रकार संगठन परित्याग

 नेत्र बिक्रम चन्द बिप्लव नेतृत्वकाे नेपाल कम्युनिष्ट पार्टीको सुभेच्छुक संस्था जनपत्रकार संगठनका सर्लाही जिल्ला संयोजक लाल बहादुर पाठक (राजेश)नेकपा (माओवादी केन्द्र)मा प्रबेश गरेका छन ।
माओवादी केन्द्रका अध्यक्ष एवम गणतन्त्र नेपालका प्रथम  प्रधानमन्त्री पुष्पकमल दाहाल (प्रचण्ड)को उपस्थितीमा सर्लाहीको बागमति नगरपालिका ८ साेल्टी बजारमा शनिवार भएको बृहत जनसभा एवम पार्टी प्रवेश कार्यक्रम मार्फत पाठक माओवादी केन्द्रमा प्रवेश गरेका हुन । उनलाई माओवादी केन्द्रका अध्यक्ष प्रचण्ड र बरिष्ठ उपाध्यक्ष  नारायणकाजी श्रेष्ठ(प्रकाश)ले  टीका खादा लगाएर पार्टीमा स्वागत गर्नु भएको हाे ।
माओवादी केन्द्रमा प्रवेश गर्दै जनपत्रकार संगठनका सर्लाही संयोजक पाठकले नेपाल कम्युनिष्ट पार्टी फुटिसकेकोले त्यस्को भविष्य नभएको र पार्टी कम्युनिष्ट बिचारधारा र सिद्धान्तमा अडिग हुन नसकेको बताएका छन । पाठकले अब आफ्नो नयाँ कम्युनिष्ट यात्रा माओवादी केन्द्रबाट हुने उद्घोष गरेका छन । विगत लामाे समयदेखि माओवादी केन्द्र निकट प्रेस सेन्टर नेपाल सर्लाहीको टिमसंग पाठककाे आन्तरिक छलफल जारी रहेकाे थियाे ।