सर्लाहीको हरिपूर्वा नगरपालिका ६ स्थायी घर भएका विल्टु राय शनिबार बिहान मृत भेटिएका छन् । सोलुखुम्बुकाे नेचासल्यान ४ काे फुर्के सामुदायिक वन उपभोक्ता समूह मतदान केन्द्रमा खटिएका मतदान अधिकृत राय सुतेकै ठाउँमा मृत भेटिएका जिल्ला प्रहरी कार्यालय साेलुखुम्बुले जनाएको छ।
जिल्लाको नेचासल्यान ५ को आयुर्वेदिक अस्पतालमा कार्यरत उनलाई त्यहाँको मतदान केन्द्रमा अधिकृतका रूपमा खटाइएको थियो।
५६ वर्षीय अधिकृत राय प्रेसर र सुगरबाट पीडित थिए। शुक्रबार राति खाना खाएर सुतेका उनी बिहान मृत भेटिएका जिल्ला प्रहरी कार्यालय सोलुखुम्बुका प्रहरी प्रमुख प्रहरी नायव उपरीक्षक सुनिलजंग साहले जानकारी दिए । उनका अनुसार शनिबार बिहान करिब ४ बजेतिर अन्य कर्मचारीले उठाउन खोज्दा उनी नउठेपछि प्रहरीमा खबर भएको हो। मुचुल्का उठाएर शवलाई पोष्टमार्टमका लागि अस्पताल लैजाने तयारी गरिएको प्रहरी नायव उपरीक्षक साहले बताए।
